<div id="MiddleColumn_internal"> <p style="padding-left: 20px; ">भातुकलीच्या खेळामधली राजा आणिक राणी<br />अर्ध्यावरती डाव मोडला, अधुरी एक कहाणी ॥धृ॥</p> <p style="padding-left: 20px; ">राजा वदला, “मला समजली, शब्दांवाचुन भाषा<br />माझ्या नशिबासवे बोलती तुझ्या हातच्या रेषा”<br />का राणीच्या डोळां तेव्हा दाटुनि आले पाणी ? ॥१॥</p> <p style="padding-left: 20px; ">राणी वदली बघत एकटक दूरदूरचा तारा<br />“उद्या पहाटे दुसर्या वाटा, दुज्या गावचा वारा”<br />पण राजाला उशिरा कळली गूढ अटळ ही वाणी ॥२॥</p> <p style="padding-left: 20px; ">तिला विचारी राजा, “का हे जीव असे जोडावे ?<br />का दैवाने फुलण्याआधी फूल असे तोडावे ?”<br />या प्रश्नाला उत्तर नव्हते, राणी केविलवाणी ॥३॥</p> <p style="padding-left: 20px; ">का राणीने मिटले डोळे दूर दूर जाताना ?<br />का राजाचा श्वास कोंडला गीत तिचे गाताना ?<br />वार्यावरती विरून गेली एक उदास विराणी ॥४॥</p> <p style="padding-left: 20px; "><span>गीतकार : मंगेश पाडगावकर </span><br /><span>संगीतकार : यशवंत देव </span><br />गायक : अरुण दाते</p> </div>