<div id="MiddleColumn_internal"> <p style="text-align: justify; ">जन्म - ३ मार्च १८८३. सनदी स्थापत्य अभियंता. त्यांचे शिक्षण ट्रिनिटी कॉलेज, डब्लिन येथे झाले. ते १९०६–४५ या काळात मुंबईच्या सार्वजनिक बांधकाम खात्यात अधिकारी होते. मुंबई इलाख्याकरिता त्यांनी सिंचाईसंबंधी संशोधन व विकास करण्यासाठी वेगळा विभाग स्थापन केला आणि या विभागाची १९१६–३८ या काळात धुरा वाहिली. १९३८–४५ या काळात ते पुणे येथील जलमार्ग प्रयोगकेंद्राचे संचालक व १९४७–५८ मध्ये इंग्लंडमधील टेम्स नदीवरील वॉलिंगफोर्ड संशोधन केंद्राचे संचालक होते.</p> <p style="text-align: justify; ">नद्या व खाड्या यांतील प्रवाहवृत्ती, त्यांचे विनयन व नियंत्रण तसेच किनारा संरक्षण यांचे प्रत्यक्ष व प्रतिकृतींवरून संशोधन करून इंग्लिस यांनी बिहेव्हियर अँड कंट्रोल ऑफ रिव्हर्स अँड कॅनाल्स हा ग्रंथ व त्यासंबंधी इतर संशोधनपर लेख लिहिले. सर्वसाधारण पावसामुळे येणारा पाणलोट काढण्याचे त्यांनी बसविलेले सूत्र आधारभूत समजतात व ते इंग्लिस सूत्र या नावाने ओळखण्यात येते.</p> <p style="text-align: justify; "><strong>लेखक :</strong> भ. प्र. ओक</p> <p style="text-align: justify; "><strong>स्त्रोत :</strong><a class="external-link ext-link-icon" href="https://marathivishwakosh.maharashtra.gov.in/" target="_blank" title="नवीन विंडो मध्ये ओपन होणारी बाह्य साईट ">मराठी विश्वकोश</a></p> </div>