<p style="text-align: center;">తనతో<br />పరిచయం నిన్న మొన్నటిది కాదు<br />కొంగుముడి నాటినుంచే<br />ప్రతి అడుగూ ప్రేమపాదుల దారై సాగుతున్న<br />అందమైన జీవన ప్రయాణం!</p> <p style="text-align: center;">తనకిచ్చిందేమీ లేదుగానీ<br />ఆదిలోనే చదువుకు అడ్డుపడ్డ వైకల్యానికి<br />కొత్త అడుగులు నేర్పి ఊతమయ్యాను<br />పట్టుసడలని నమ్మకానికి ప్రాణంపోశాను<br />తనకు చేసిందేమీ లేదుగానీ<br />పేదరికం ఆంక్షల అడ్డుగోడలైన ప్రతిసారీ<br />ఆమె ముందు ఆత్మ విశ్వాసమై నిలబడ్డాను<br />అన్ని వేళలా భరోసా వాక్యమై వెంట నడిచాను</p> <p style="text-align: center;">కన్నవాళ్ళని పోగొట్టుకుని<br />పుట్టెడు ద్ణుఖంలో ఉంటే<br />కంటి చెమ్మ తుడిచి<br />కలిసి జీవితం పంచుకుందామనే<br />ధైర్య వచనమయ్యాను గానీ<br />తనకు తానుగా నన్నేమీ అడగలేదు</p> <p style="text-align: center;">ఒద్దికైన జంటను చూసి<br />కాలానికి కన్ను కుట్టిందేమో<br />ఇద్దరికీ శాశ్వతమైన వైకల్యాన్ని అంటగట్టి<br />జీవితానికి సరిపడా విషాదాన్ని మిగిల్చింది</p> <p style="text-align: center;">అయినా...కాలానికేం తెలుసు?<br />ప్రేమతో కట్టుకట్టి ఆత్మ స్థైర్యపు లేపనం పూసీ<br />ఇలా స్ఫూర్తి వాక్యాలమై నిలబెడతామని<br />తెలిసుంటే ఇంతటి గాయం చేసేది కాదేమో?</p> <p style="text-align: center;">ఎన్ని గాయాలనైనా భరిస్తూ<br />తాను నిలబడుతూ నన్ను నిలబెడుతూ<br />బిడ్డల పలకలపై అక్షరాల్ని కలగంటూ<br />ఇంటినొక నిబ్బరవేడుకని చేసే తను..</p> <p style="text-align: center;">నాతో తోడుగా నడుస్తున్న వాక్యం !</p> <p style="text-align: right;"><strong>- ఆది ఆంధ్ర తిప్పేస్వామి</strong></p> <p style="text-align: left;"><strong>ఆధారం : <a title="External website that opens in a new window" href="https://prajasakti.com/Nadustunna-vakyam" target="_blank" rel="noopener">ప్రజాశక్తి</a></strong></p>